Балаларның кече яшьтән үк табигатьне сакларга кирәклеген аңлап һәм яратып үсүе мөһим

1июнь –Халыкара балаларны яклау көнендә балалар бакчасында "Россиякүләм Эколяталар көне"н дә матур итеп билгеләп үттеләр. Бу көнне бакчага "Гринта" оешмасы вәкилләре килде. "Гринта" проекты җитәкчесе Чабдарова Наталья Валерий кызы һәм “Гринта” оешмасының Җәмәгатьчелек белән эшләү бүлегенең әйдәп баручы менеджеры Ионова Анна Михаил кызы балалар белән "Эко-дәрес" уздырды. Кунаклар балаларга чүпне аерып җыюның әһәмияте турында аңлаттылар. Чүпләрнең кайсы сортка керергә тиешлеген күрсәтмә материаллар  белән аңлаттылар. "Эко-дәрес"тә балалар ике командага бүленеп күңелле эстафетада катнашты. Биремнәр тормышчан- пластмасса, кәгазь, тимер, пыяла чүп калдыкларын тиз арада аерып җыярга кирәк иде.
Балалар бакчасының экология юнәлешендәге актив эшчәнлеге "Гринта" җәмгыяте тарафыннан югары бәяләнде.

Балалар бакчасы оешманың рәхмәт хатына лаек булды. Балалар да бүләкләнде- аларга кунаклар экология тематикасындагы файдалы һәм мавыктыргыч буягычлар алып килгән иде. 

Балалар бакчасы мөдире Миләүшә Әгъләмова "Балаларның кече яшьтән үк табигатьне сакларга кирәклеген аңлап һәм яратып үсүе бик мөһим. Киләчәктә без тәрбияләп үстергән балаларның табигать сакчылары булуына ышанып калабыз".